香港新浪網 MySinaBlog
阿浩 | 12th Feb 2011 | 生活 | (95 Reads)

荃灣龍珠堡,一間屹立荃灣多年的漫畫鋪,與很多荃灣的漫畫迷,經歷無數個寒暑......下星期,就結業。

 

亞叔淡淡然說:「係呀,加租加得勁,加埋依家D人鍾意上網睇公仔書,蝕住咁做…唯有唔做咯。」他,如常一般親切。

 

「亞叔,你唔做,咁我點算呀?」這問題,傻得連我自己也發笑…

 

其實,工作忙,時間少,我已經不像學生時代般,整天留連龍珠堡…但是,龍珠堡結業,我真的萬般捨不得…

 

我入會,比起很多師兄,不算長,但數數手指,也有十五年…

 

雖然網上漫畫很方便,但我還是喜歡有本漫畫拿在手,慢慢嘆,從前年假,暑假,甚至現在有空閒,我也會一次租十幾本漫畫回家,這是種享受…

 

亞叔,不算什麼親人,但也算是”睇住我大”。

 

記得當年,漫畫在搜書包時給學校沒收了,亞叔沒有要我賠錢,只跟我說:「你拎返本書先還啦。」我不是受到特別優惠的一位,是因為亞叔就是這樣和藹可親的好人,對人人都這樣好。

 

龍珠堡,這樣越來越罕見的一間溫情小店,就因為加租與網上漫畫的夾擊下,結業了。

 

我不想在此控訴地產商的不是,也不想討論網上漫畫的對與錯,因為再多道理,也挽回不了龍珠堡…我只想說,我真的捨不得龍珠堡的離開…

 

在冷酷無情的商場店鋪圍繞下,我真的捨不得這間,就算沒有新漫畫租,到了也會跟亞叔閒聊兩句的小店。龍珠堡,是間不需什麼 customer relationship management,我也只會忠於它的小店…

 

社會進步,商業無情,有些事,沒辦法改變與轉變,我只能用文字,去紀念龍珠堡,與亞叔。

 


阿浩 | 4th Jan 2011 | | (71 Reads)

即係咁,為左達成2011年要出26篇blog既偉大目標,所以除左努力寫下故仔寫下小感之外,都要開下d新Topic,所以就諗左呢個好呃秤既Topic,研詞。

研詞,故名思意,就係研究歌詞。

成日認為,歌如人,曲是人的外表,詞是人的靈魂,你會因為優美的旋律而喜歡上這歌,但這歌能真正感動你的地方,是句句窩心的詞,當然,曲詞都好當然妙,但比我揀,還是以詞為先。

好,今日研的,係 主唱古巨基,作詞林夕,作曲曾家瑋,編曲藝琛 既 蠻不講理

好彩係Youtube搵到片,聽下歌先。

詞:

問有誰可計較清楚  在這人間有幾可公道過
但求不虧心不必志在結果  沒有人可力挽當初
沒有人可永遠都不犯錯  如何花光心計策劃太多
這是愛 誰望天肯將眼開  情人若肯不用誰都會自來  門若上鎖別去開

*誰辜負你 不服氣 如果他傷你 你吞聲忍氣
 想徹查情人的心理 謀略亦難以令對方歡喜
 講道理 誰講道理 會可免分離 你哪須交戲
 不與旁人殘忍競技 對方選擇你 不管何事都選你*

沒有誰可勉強得到  沒有誰因算式得出情愫
沒人相戀倚靠上學惡補  這是愛 人是你的定會
流盡淚水怎樣去改變未來  難道回望令你可愛

愛比人生還玄 任你怎計算 再不愛的心怎說服也只會更加倦
互愛發於自願 是人間美眷 不費力氣亦得嘗未了願

Repeat *

他感動你 不包含甚麼天理 


Overall

呢首歌,其實唔係咁易有感觸,因為呢首歌句句詞都係"亞媽係女人"既大道理,唔夠貼身,所以難有投入感。

不過,當有d經歴,遇過d非分不可或者無奈既情況,呢首歌就會變得句句精警,而最妙既地方,就係用蠻不講理呢四隻字,總括晒詞中所有得解釋,無得拗既大道理........雖然唔係華麗既文字,但句句平實反而更加直接攻入你心。

其實句句顯淺易明,真係無乜好研,但真係填得好好,所以一定要Post呢首歌。

每一次聽,都會有d不同既領悟,有時真係會repeat好多次聽。

詞種:人生經驗式

歌詞Highlight 度:90 %,其實真係句句都值得細味。

最鍾意既一句:

真係好難揀,唯有咁括

"不與旁人殘忍競技 對方選擇你 不管何事都選你   他感動你 不包含甚麼天理"

呢句其實真係唔簡單的, 

不與旁人殘忍競技  <<-----唔令自己受傷害,唔埋沒良心,放鬆自己,平常心,不對自己與別人殘忍,能嗎?

對方選擇你 不管何事都選你  <<----- 是一見鍾情還是千經萬歴也好,是什麼都不做或做錯很多事都好。

他感動你 不包含甚麼天理  <<----- 同一件事同一地點所有條件相同,為何A君做會感動你,B君做會嘔心?就是沒有天理啦!

 


阿浩 | 17th Dec 2010 | 我是你的誰 | (67 Reads)

<我是你的誰>,要爛尾了。

這作品是我重寫計劃裡其中一篇。

那時決定重寫,是因為舊版既<我是你的誰>,太粗糙;

現在決定放棄,是因為,現在的我,根本不是當時的我。

現在的我,想法與"感覺"也跟當時的我大相庭逕,所以,現在重寫<我是你的誰>,不能得心應手之餘,更處處不滿意……我自己在跟自己不斷對抗。

Vol. 13實在寫了太多遍,還是不滿意,終於明白了,這個故事,不再屬於我,她已經是屬於時間的了。

就分手吧。

她帶給我那"青澀感覺",我會記住,也會用這份感覺,去繼續將來的故事。


阿浩 | 22nd Jul 2010 | 生活 | (68 Reads)

就快啦~~我是你的誰 vol.10 終於就快完成啦.............

 距離vol. 09 .........都成 10 個月,根本連我自己都以為爛尾。

我相信好多人都唔會記得個故仔咯~無他0既,連我自己都唔記得,哈哈。

咁點解仲要寫?我都唔知點解, 或者只可以講,放低左寫野咁多次,都總會拎得返起,算我係真係好鍾意寫野呢個活動…

係寫緊vol. 10既時候我發覺……

1.)原來屋企唔再係一個寫野既好地方,我返到屋企,就好想休息,同訓咯…反而坐係星巴克,我好快就起晒稿。

2.) 寫完呢一篇之後,下一篇應該係寫野一個重大既挑戰,但我ok,I am ready。

3.) 有關於純愛情既故事,我諗寫埋呢個,應該會完架啦,畢竟年少輕狂的事情早已過去,而我真係真想寫一個辦公室既故事,咁多年既工作經驗,我相信寫出0黎一定會好爆,我相信連我自己都會寫得好興奮。

4.) 我諗我唔會再有出書呢個想法,畢竟,都係一種虛榮感0者,反而我會搞下電子書呢家黎野,放上各大forum,雖然就算無人睇,我都會繼續寫,但係始終都想有人睇0架嘛。

 有人話blog文化已經沒落,mysinablog呢個平台更加自我放棄,而然筆園更加無人睇添,但暫時寫blog都仲係我既首選……blog同其他文章發表原地最最最唔同既係,這裡就像是我的家,我想點都得,哈哈。


阿浩 | 1st Feb 2010 | 我愛的....... | (42 Reads)

我為何愛爛gag?讓這首歌告訴你。

怎麼要讓我發現你 全世界完美 就由我嘴巴抖震起
一眨眼就已發現你 略過了前戲 一切也這麼沒準備
在這瞬息之間 學會了妒忌 花許多分鐘 靜心欣賞你
願你我的距離 在說話裡式微

可知我習慣數十秒 就說個玩笑 在乎笑聲的多與少
可惜轉頭你告辭了 就算有人笑 這個笑話亦沒巧妙
沒有你的一刻 談吐哪樣妙  欣賞跟鼓掌亦都不想要
若你也可笑彎了腰 一切方會沒缺少

明日你再有時間 我最掛念的 可會賞賞面跟我聚餐
明日你再有時間 我要過來參觀你化妝間
明日你再有時間 要看你一室擺設 看到我深深感嘆
當然我仍無忘記 然後說笑話


阿浩 | 30th Jan 2010 | 男男女女 | (74 Reads)
 經過多年既訓練,我一直都以為我自己都OK明白女仔諗乜,但近排發覺,其實我始終都係一個麻甩佬。

好多"乙水",我都會視而不見咁踩落去,仲踩得好開心添,點知踩完,就知道,食屎啦今鋪。

痛定思痛,我決定開始係腦海入面一直想寫既Topic,男人,序。

序者,縮字也好,食字也好,請君自解。

第一序,我想講既係,控制。

你睇下,當一個小男孩未受污染時,行過玩具鋪都想買架遙控車,你就知道咩叫天性。

控制有咩好?不如我問你,隨心所欲有咩唔好?話明天性,真係好難解釋,總之,當你想架車轉左既時候,佢跟住你想既方向同角度轉,呢種快感,真係好過癮。

又 例如打機,你控制既球隊/人物,贏左你既對手,就算唔情不自禁歡呼,都會沾沾自嘻微笑,點解?因為我勁過你------>我操控好過你 ------>我控制力好過你,呢種感覺,直情無可比擬。所以女仔成日講,"都唔明點解你地打機贏左會開心成咁"。天性,你地係唔會明架啦。

可惜,世界唔係圍住你轉,控制,只會越來越小,到最後,極有可能係受控制,你話,要違反天性,幾咁唔好受先得架。

所以男人發明左一樣終極厲害既武器,講道理。道理,包含道德,包含一種應該同唔應該既意思。因為我地相信任何人都係有教養,會明白咩叫應該同唔應該做,所以係有道理既情況下,可以避免唔應該做(我唔想做),同應該點做(最好你點做),目的,都係唔想比人控制,同控制人。

另一個可惜,大部份男性成日都曲解道理去掩飾自己,搞到講道理呢樣武器比人唱衰晒。例如"我出街有我既自由,你做乜要管我。"  ok,人係有自由,但自由係本於自律,唔該自律左先同人講自由。

扯遠左添,或者再有機會先開個topic講"講道理",不過,就算極惡咁講道理,又或者好溫柔既講道理,到最後既目的,都係唔想比任何人控制,再者就係終極目的,控制人。

講到咁明,一定會有人話,男人係無恥,講乜都係假,都係想控制人或者係唔想比人控制,嗯...............假少少總好過直接同人打對台嘛,大家都明白,自己識做,就最好不過啦,係咪?

同埋鍾意控制唔係壞事黎既,你有無聽過男人講"我係唔鍾意控制自己架啦,我係要任性係要發脾氣架啦,點丫?"雖然都係逃唔出我修養好過你------>我自控力好過你------>我控制力好過你。

既然女性既天性入面都無"控制"呢家野,不如比我控制埋你果份啦。(一種分析性既講道理,又被人稱為歪理。)

所以話呢,就算幾咁幾咁無所謂既男人,心底裡都一底會有句,"如果你咁咁咁做就好啦。"唔信?返去問下你男人細個想唔想架遙控車或者鍾意揸車,又或者打機啦。

不過呢,我就三樣都唔係特別鍾意既,而且我呢類鍾意睇書聽歌既男仔,即係鍾意接受外來既事物,即係好善解人意啦,又唔鍾意控制啦,真係無得頂架,嘻嘻嘻。

阿浩 | 5th Jan 2010 | | (238 Reads)

Picture

這個封面,實在影得佢靚。

今夜終於能靜靜地把謝安琪的 Slowness 聽一遍。

這張唱片比Yelling好得多,更不下於Binary。

一如大部份評語,整張碟貫徹了Slowness這主題,重沉的慢,輕鬆的慢,溫馨的慢,悲傷的慢,而除了貫徹主題外,謝安琪亦演繹得相當到位,可以聽得出這碟下了不少苦心。

客觀評語,相當好,可惜當我聽畢後,一點也不覺得"正"。

這張碟,應該可以令謝琪登上大雅之堂,但也把我愛的謝安琪帶走了。

這張碟,充滿說教,人生大道理之感,可惜……

我愛的謝安琪,不是替你高興,而是悟入歧途;

我愛的謝安琪,不用鐵路載我走,而是一起坐飛Van感受亡命之途;

我愛的謝安琪,不是感慨的最後晚餐,而是一起叫個星洲米的我愛茶餐廳;

我愛的謝安琪,不是悔不當初的雨過天陰,更不會設上寬限期,而是年少輕狂的戀上臭男人……

我明白,你要改變,要為重量級,受各界認同的人物,而這改變,也十分成功。

我明白人生有不同的階段,豈能一世市井一世任性?

可惜,我還未夠愛你,還未能跟你一起成長,我留戀當初的你,我實在還未接受曾經跟我一起市井一起無聊一起爛的你,正在激勵我,跟我感性,跟我說教。

我愛的謝安琪賴床,何需繼續與理智在鬥爭?打爆個鬧鐘繼續訓就是了。


縱然這碟很好,但也不會熱播。對不起,你很好,是我配你不起。

Picture

這個謝安琪,也不太差吧?最起碼我喜歡。


阿浩 | 14th Dec 2009 | 生活 | (52 Reads)
作為代表隊,確實應該要從各球會內選出最佳球員,代表香港出賽,但為何現在的香港隊,多數以南華球員為主?是否羅生真的在香港球壇”玩晒”?

羅生雖然有點霸道,有點臭串,曾經不讓東方的外援加入港聯,但是,搞好香港足球的心,是可以肯定的。所以,我不曾懷疑過他用人唯親,要南華威盡,要完全屬於自己的南華代表香港,而事實,我亦撐現階段的港隊以南華為骨幹。

首先,亦是最主要,體能問題,可以肯定,在金sir的帶領下,南華球員的體能冠絕全港。不是所有南華球員的技術都是最好,但九十分鐘甚至百二分鐘的穩定性,比頭二十分鐘好波遠為重要。

其次,默契問題。足球除了講求體力與技術外,默契也十分重要,隊友如何好波也好,走錯位,接不到傳球,就是錯失了機會。言而南華有自己的基地,訓練時間比其他球隊多,加上長時間同時訓練作賽,默契一定比東湊西拼的代表強,所以就算數不是所有球員都是最好波,但把握的機會一定也比較多。

再者,南華幾近乎已經盡收天下兵器…有質素有實力,哪個不在南華隊?當然有,盧均宜,林嘉偉,甚至年紀大一點的沈國強等,也不在南華隊內。盧均宜較慘,他和歐陽耀沖就像艾馬與列基美一樣,既生瑜,何生亮?但其他人也因為體力與默契的問題,不在有限的代表隊名單當中。就有如法比加斯好波,但西班牙國家隊還是恩尼斯達加沙維一樣。

所以現階段的港隊,就是以南華為主,再在某些位置上找上替補湊拼而成。

好處,當然是即食,用此方法,一定有快有成績。

壞事,卻是始終未能組成一支最強的代表隊。雖然體力和默契是重要,但技術往往是取勝的關鍵,況且,現在羅生是用錢來揀隊員,有些人,總是買不到的。(例如葉鴻輝當初追隨和仔加盟東方,可見一斑)

非常事用非常法,我相信羅生現在用的方法,對一池死水的香港球壇有很大的作用,但長遠來說,也要各方的支持,才能繼續成事。最小,港隊應該有個屬於自己球場,隊員可以練到幾夜就幾夜,不用場地夠鐘便被人趕走吧?要是我代表香港努力也落得如些對待,好無癮的說。

註:除了羅生,伍健也出了很多力,雖然伍健所做的不及羅生般搶眼,但他著重培訓香港年青球員,是香港再次成為亞洲列強的最重要一步!

阿浩 | 13th Dec 2009 | 生活 | (73 Reads)
難道山度士,譚兆偉,蔣世豪,招重文等人,會比歐陽耀沖差嗎?范俊葉又真的比不上葉鴻輝?徐德帥強得過羅繼華嗎?歐偉倫也及不上陳七?通通也不,在我而言,奪金的成員,還比不上前輩們,但他們就創下了前人辦不到的成就。

要奪金,不是一兩仗漂亮足球可以達成的。前輩們輸的,不是技術,是一份熱誠;小輩們贏的,不只是體能,最重要是一份香港足球還未死的火,靠這份鬥志,贏了這項賽事!

你可以說其他國家根本不重視這比賽,派來的都是次級隊伍,所以才有機會得到這面金牌,但勝過橫掃亞洲各個級別的日本國家隊,難道這是容易嗎?當年,大港腳連日本青年軍也鬥不過,今天,一眾同齡球員,拉成均勢,進步之大,可想而知。

所以,請不要說這面金牌是兒嬉和沒有代表性,這金牌,十分十分重要。

當最後一球十二碼射進的時候,我真的感動得差點哭出來。相比起純粹支持香港足球的人,我們這些曾經以成為職業足球員為目標的小伙子,更為感動深刻。這面金牌,除了是一份香港人的榮耀,也是一份夢想的引證!!!!!!!!!!!!!!!

我相信,今天在大球場,電視旁支持香港足球隊的人,一定比起其他項目的支持者多上數百倍!請政府不要只為成績而把足球剔出重點項目之餘,足總同時搞好香港職業足球。(搞唔好請比羅生伍生搞)畢竟,這運動,是世界最流行,最能激盪人心的!

阿浩 | 7th Dec 2009 | | (72 Reads)
唔覺唔覺仲有一個月,零九年又會過去。今日望望,發覺我既MP3 Playlist 竟然無乜新歌?究竟係我今年太忙到真係無乜歌值得留意/搶耳?

我好得閒加無聊咁,上Coolmanmusic 搵搵零九年大碟來望望……

噢~~原來今年,吸引我既碟真係唔多,以下,就係零九年,屬於我既叱吒。

第一位
Picture

唔洗問,一定係Swing 既武當,一出即買,熱播超過兩個幾月。一隻既多元化又統一既大碟。多元化,係成隻碟既音樂風格,10首歌,就係10首歌,唔會一式一樣。統一,就係歌碟內既態度,就好Swing對世事既睇法(即係我口中既麻甩佬看世界),無論曲風歌詞都hit中晒我,點可以唔熱播?

第二位
Picture

就當是彼得,灰色身體小飛灰~~第二隻,就係周國賢既精選碟。入面既舊歌已經係長年霸佔我playlist既位置,新歌又夠得意,所以支持0左佢。我一直都鍾意佢,佢既歌,就有種明白世事卻又大唔透既感覺,正是我們這種.............青年。

第三位
Picture

方峼玟既unlock me!!其實係佢出道時”要讓你知道”,我已經覺得佢正(唱and樣),不過就係紅唔起。老實講,unlock me 呢個look 我就麻麻地,不過入面d歌我就ok喎,型咯!(雖然有人話懶型),她唱的就是她。

第四位
Picture

陳奕迅既H3M。論每一歌來講,首首歌都可以獨當一面,好聽,所以就係playlist內。但成隻碟既風格好唔統一,唔可以令人又頭聽到尾,所以到最後,就係揀歌聽了。

第五位
Picture

薛凱琪既Read Me。嗯,人靚聲甜,雖然得四首歌,但有快有慢有輕有重,詞方邊又有d詩意,就係咁,playlist內有她了。

第六位
Picture

謝安琪既Yelling。呢隻碟,好快係我既playlist落馬,因為真係好失望。老實講,佢走唔走音唔關我事,我一直都唔係覺得佢唱功特別好,我只係鍾意佢做出0黎既0野,有風格有味道,上年熱播既Binary就係好好既例子,入型入格,私隱線好聽得意又夠串,係香港真係難得。而Yelling,就係好似Binary既次貨咁…型又唔型,得意又唔得夠意,串又唔夠串……唉……

第七位
Picture

最後一隻,登登登,點都估唔到,就係假大眼,唔係,係傅穎既Dearest,哈哈。今年佢係勁歌唱吃了屎,唔係,吃了花的女孩,真係技驚四座眼都突埋。佢唱歌那一份懸崖感,真係幾獨特!(註,懸崖感,就係好似粒粒音都唔穩,企係懸崖側面就跌就跌咁。) 不過,呢隻碟既東洋曲風,我確又喜愛,她小小的愛情,我buy 0架。

好多人激讚既Mr. 同 Rubberband,我竟然無聽過喎,講起都奇怪不過我又真係提唔起興趣,睇下他日有無機會啦。農夫近排真係唔多掂,王菀之又係唔係突然搞乜鬼…希望佢地下年歸位啦~

Next