  |
  
|
轉新工，我終於有幸見識到返九點迫地鐵既生活。
無錯，之前幾份工，都唔多洗迫地鐵，依家先發覺，原來從前好幸福。
咁我係南昌站轉車啦，好多人都預0左0架啦~~咁都算，但係喎~~我唔明白，我明明係排頭一個既人，都唔知點解可以有後過我既人上車先…迫上0黎…基於禮貌同修養，我都比佢過，但心裡面其實真係好想一個批爭鋤埋去，跟手鬧一句："排隊啦！"
最慘就係地鐵工作人員不斷呼籲"請盡量行入車廂中間，多謝合作"，但就係永遠迫死係上車既位置…我都唔明d人究竟係唔明"行"係點解丫，或者唔知"車廂中間"係咩位置？定係唔知咩叫"合作"呀？
今朝仲過份，明明都上到架車滿晒(有幸我企到最邊)，d工作人員都係到叫緊"上唔到車既乘客係等候下一班車"，就係呢個時候，有位高貴既大大大姐(個大係指年紀)係臨閂閘之前一0野衝入0黎，撞0左我0野甘0既，之後仲回以一個，"企入d嘛"既眼神…哇～個心團火呀…你咁高貴，撘的士啦～拍塞車咪坐直升機咯，何必同我迫？
吼吼吼吼吼吼吼吼吼吼吼吼吼吼吼吼吼吼吼吼吼吼吼吼吼吼吼吼吼吼吼吼吼吼吼吼吼吼吼吼吼吼吼吼吼吼~~~
因為靚，因為健康，種種原因都好，我相信無人會鍾意肥，所以減肥唔只係女人既終生事業，其實係每個肥人既終生事業。
我睇細個時候既相，我原來好細粒(我指5~6歲既時)，直到哮喘，亞唔知邊個醫生話要抵抗力好，個病先會斷尾，亞麻跟手係咁迫我食，從此，脂肪，就跟我形影不離。
我第一次討厭肥，係因為上運動堂既時候，同學因為我肥，唔比我踢，迫我守龍門。我真係覺得好無癮，點解肥等如無得踢波無得跑？幸好守龍成為我既終生興趣之一，所以我唔同脂肪計。
第二次，相信都係比人批評我既外表，我真係唔知點解肥人埋唔到堆……肥……下賤過瘦既人？其他人，總會唔多唔少笑下你肥，傻下傻下咁……我真係諗到頭到爆，肥…就等如傻？我開始同脂肪計。
第一次減肥，應該係中五之後既暑假。當時我日日(請注意，係日日)游水，烈日當空下踢波，戒食牛(不過食量無乜點減過)，兩個月後，由160磅變到130磅。呢次真係好成功，係完美的減肥。
之但係開始工作，去蒲，飲酒，少做運動，加上為食，又慢慢開始重…22歲，我又開始好重……第二次減肥，係澳洲讀書，成日做gym，晚晚都百幾下situp，雖然成效唔快，但返香港之前，已經回落到145磅…
第三次減肥，就係第二份工之後……致肥既原因唔洗問啦，咪又係去玩，唔做運動，同……為食咯…點解係第二份工之後呢？其實體重一直都係臨界點，但晚晚都出街無時間，撞正該段時間好得閒……成日返屋企，就一食完飯就落街跑……不過…已經唔成功啦……呢次……5磅都唔知有無…
近來，我又減肥啦…之前試過好多方法，都真係好似唔成功。唯有回歸基本……做運動！！可惜，運動量無以前咁多，食量卻比以前多…好努力咁游廿個直池，但之後既自助餐仲努力過游水。明明尋日食得唔多，又跑得足夠，但今日lunch整個 double足三兩 加個香蕉批……當食完既一刻，我真係充滿罪惡感……呢種罪惡感，就好似既然好愛一個人，點解又出去偷食？不過魔鬼又會同你講……你偷完食，更加愛返佢咪得咯，或者偷食埋今次好啦……由
140，150，160…………………………………………………………………………………………………………臨界點一次比一次高……點…點算？
當我踢波跳唔起，力不從心，或者著恤衫都現肚腩既時候，我真係好討厭自己肥，但……我真係好鍾意食啊……當一件美味既甜品，或者啖啖肉既牛扒，再或者撈幾碗飯既肉餅放係你面前，真係打死都忍唔到……何苦要纏著我不放？何苦我要討厭自己？
我常說，人與人的聯繫，不是靠記住他的名字，而是記住六種感覺。
記得他樣子，聲音，觸感，氣味，味道，和一種第六感。
我想，記得一個人的樣子與聲音，無論是敵是友，都有一定認識。再加上觸感，氣味的話，已經很親密了。能認得他的味道，關係已經在另一個層次。
第六感，是一種突如其來的轉變，一剎那由朋友變情人，變敵人，又或是由零至有的一見鍾情…
這六感，沒有次序，可以記得他的樣子跟氣味，又或是樣子跟第六感…
而六感中的聲音，頗特別的。
是要去感受什麼叫這麼近，那麼遠，或者似有還無，虛無縹緲的感覺，憶起一個人的聲音，很相似。
要是熟悉的人，你從不會忘記他的聲音，但當你在腦海中嘗試製造或模擬他的聲音時，卻感到不實在…到最後，還是想親耳聽一次…
最近在巴士，看見一些攝錄機的廣告，便想自己整天都說要盡量保留生活趣事，留待年老時回味(不過經常做不到…)
便憶起亞嫲，她的可愛的樣子，衰衰地的笑容，老人家混合著煙的氣味，起了紋的皮膚，和…似有還無的聲音。
努力去模擬，但還是不清楚…我便後悔為何沒有拍下她，聽一聽她怎樣喚我的名字。有衝動回娘家找有關於亞嫲的錄影，但最後有這樣做，因為怕媽媽胡思亂想，擔心我例如是否工作壓力太大，是否情緒有問題…之類…
屋企人唔清楚同適應另一個的我，不過，其實都係掛住0者，我感性嘛。
